Europa çdo verë pret miliarda turistë nga e gjithë bota, dhe historikisht gushti është muaji i fluksit. E kuptueshme, pas pandemisë shifrat po shtohen çdo verë.
Por si është gjendja e çmimeve, ndikuar edhe nga lufta në Ukrainë, sidomos në restorante?
Numbeo, sistemi më i madh i të dhënave në botë ka renditur shumë shtete në botë në Indeksin e Çmimeve të Restoranteve dhe koston e një dreke në një restorant mesatar për dy persona (tre pjata), ku kemi përzgjedhur vetëm shtetet e Europës.
Siç shkruan Monitor, nëse do të shkoni në Zvicër duhet të merrni masat dhe të mbushni portofolin. Ky shtet ka dhe qytetet me restorantet më të shtrenjta në Europë. Një drekë për dy persona në Zug apo Zyrih kushton 123 euro mesatarisht për dy vetë. Po ashtu në Gjenevë, Lozanë apo Bazel, sërish do ju duhen pak më shumë se 100 euro.
Portugalia është më e lira nga desinacionet e njohura turistike. Në Porto për një drekë janë të mjaftueshme 35 euro për dy persona, në Lisbonë deri në 45 euro, ndërsa në zona të tjera si Aivero 25 euro. Turqia ka restorantet më të lira, nga 14 euro në Ankara në 22 euro në Stamboll.
Sakaq, bie në sy se dreka në Tiranë është më e shtrenjta në rajon, ndërsa në Prishtinë më e lira. Tirana dhe Beogradi mbajnë rekordin nga kryeqytetet e shteteve të Ballkanit për drekat më të shtrenjta me 34 euro secila. Në Podgoricë mjaftojnë 25 euro, në Shkup 24 e po kaq në Sarajevë. Më e lira në Ballkan është Prishtina, ku një drekë kushton mesatarisht 17 euro.
