Në prag të nisjes së vitit të ri shkollor, kryebashkiaku i Tiranës, Erion Veliaj, po inspekton ditë pas dite punimet në shkollat që hapen këtë shtator.
Sot Veliaj, inspektoi punën për shkollën e re “Bedri Llagami”, në Vaqarr, e cila do të jetë funksionale në semestrin e dytë shkollor, duke u bërë pjesë e paketës së 12 shkollave të reja që hapen këtë vit shkollor.
“Te shkolla “Bedri Llagami” po bëjmë vërtet një revolucion në Vaqarr. Revolucioni filloi që kur sollëm shërbimet e kopshtit dhe të çerdhes. Pastaj nga mundësia që na dha procesi i rindërtimit, lagjja e re në Vaqarr është populluar kryesisht me banorë që vërtet janë të ish-komunës Vaqarr, por të zonave më periferike e më të largëta. Atëherë argumenti ishte: Duke ardhur afër rrugës nacionale, duke qenë vetëm një stacion autobusi larg Kombinatit, duke i ruajtur gjithsesi tokat, ullishtet, pemëtarinë, blegtorinë që mund të kenë në këto zona të largëta, u jepet një shans, sidomos fëmijëve, jo vetëm që të jetojnë në një zonë shumë më afër civilizimit e urbanizimit, por sidomos me standarde në arsim”, deklaroi Veliaj.
Po ashtu Kryetari i Bashkisë së Tiranës, gjatë inspektimit te punimeve replikoi me opozitën, pas disa akuzave prej tyre.
“Ne kemi 380 nxënës, por po e bëjmë shkollën për 600. Pra të rikuperojmë njëherë atë që jemi mangut nga e kaluara dhe të parashikojmë edhe për të ardhmen Në finale, llogjet dhe debatet i merr era! Pyetja është çfarë ngelet? Kjo shkollë do ngelet edhe kur mos të jemi ne. Ndaj, them që ne jemi ndarë në dy grupe: Grupi që punon dhe grupi që merret me llafe. Grupi që merret me llafe atë punë ka bërë tërë jetën. Ne që punojmë duhet të sigurohemi që lëmë pas një gjë që do i rezistojë kohës, do jetë më e bukur, më e madhe dhe më e fortë”, tha Veliaj.
