Organizata Botërore e Shëndetësisë ka shpallur emergjencë globale shëndetësore për përhapjen e lisë së majmunëve, që nga korriku i këtij viti.
Ndonëse në Shqipëri nuk ka ende raste, virusi është shtuar në listën e sëmundjeve infektive. Ministria e Shëndetësisë ka marrë sot vendimin, i cili është publikuar në fletoren zyrtare dhe kështu futet në fuqi menjëherë.
Ministria e Shëndetësisë ka marrë masa, duke pajisur Institutin e Shëndetit Publik me teste identifikimin dhe diagnostikimin e lisë së majmunëve. Aktualisht në ISHP kanë mbërritur mbi 3250 teste, ndërsa ka nisur edhe trajnimi i mjekëve.
Simptomat e lisë së majmunëve janë temperatura, kokëdhimbja, dhimbja e muskujve dhe shpinës. Simptomat zgjasin për pesë ditë. Po ashtu, personat e prekur kanë skuqje në fytyrë, duar dhe këmbë, si dhe puçrra. Lia e majmunëve nuk përhapet lehtë mes njerëzve, mirëpo mund të bartet përmes kontaktit me lëkurën, nga rrobat apo peshqirët. Infektimi mund të kalojë pas 14-21 ditësh.
Shpërthimi i lisë e majmunëve u raportua në fillim të majit në shtetet e Afrikës Qendrore dhe Perëndimore, ku kjo sëmundje për një kohë të gjatë ka qenë epidemi.
Nga lija e majmunëve deri më tani janë prekur mbi 16.000 persona në 72 shtete të botës.
