A duhet të ndalohen vizat Shengen për shtetasit rusë së shpejti? Kjo kërkesë po dëgjohet gjithnjë e më shumë në vendet e BE, ndërsa mijëra turistë rusë po e shfrytëzojnë Finlandën si vend tranzit drejt Perëndimit.
Mirëpo, kjo e fundit ka marrë vendimin që të reduktojë me 90% numrin e vizave turistike për shtetasit rusë duke filluar nga 1 shtatori.
Ministri i Jashtëm finlandez Pekka Haavisto shpjegoi sot se qeveria finlandeze e mori vendimin pasi një numër i madh turistësh rusë po përdorin Finlandën dhe Aeroportin e Helsinkit për t’u transferuar në destinacionet turistike në Evropë, pas heqjes së kufizimeve të udhëtimit të vendosura nga Moska për shkak të pandemisë.
“Vizat turistike nuk do të ndalen plotësisht, por numri i tyre do të reduktohet ndjeshëm”, citohet të ketë thënë ministri i jashtëm finlandez. “Kjo do të thotë se llojet e tjera të vizave, vizitat te të afërmit, kontaktet familjare, puna, studimi, do të kenë përparësi dhe do t’i jepet më shumë kohë,” tha ai.
