Të hënën banorët e kryeqytetit nuk duhet ta humbin spektaklin që do të dhurojnë dy “bisha” amerikane! Bëhet fjalë për dy avionë gjigantë “B52” të SHBA-ve, që do të fluturojnë paraditen e datës 22 gusht mbi sheshin Skënderbej me qëllim nderimi ndaj shqiptarëve në kuadër të 100 vjetorit të marrëdhënieve mes dy shteteve.
Ambasada amerikane ka ftuar qytetarët të bëhen pjesë e shfaqjes që do të dhurojnë fluturimi i këtyre dy avionëve ushtarakë.
“Nuk ka mënyrë më të mirë për të nderuar 100 vjetorin të marrëdhënieve diplomatike midis Shteteve të Bashkuara dhe Shqipërisë, marrëdhëniet tona gjithnjë e më të forta në fushën e mbrojtjes dhe vlerat tona të përbashkëta të NATO-s”, thuhet në postimin e ambasadës.
POSTIMI I PLOTE I AMBASADES AMERIKANE
Nderoni drejt qiellit këtë të hënë! Të rritur dhe fëmijë, mos humbisni një shfaqje të mahnitshme ushtarake dhe ejani të shihni fluturimin e dy avionëve amerikanë B-52 nga sheshi Skënderbej të hënën, më 22 gusht.
Do të njoftojmë orën e saktë këtu në faqen tonë të hënën në mëngjes!
Nuk ka mënyrë më të mirë për të nderuar 100 vjetorin të marrëdhënieve diplomatike midis Shteteve të Bashkuara dhe Shqipërisë, marrëdhëniet tona gjithnjë e më të forta në fushën e mbrojtjes dhe vlerat tona të përbashkëta të NATO-s.
Aeroplanët B-52, të cilët për më shumë se 60 vjet kanë qenë themeli i forcës së bombarduesve strategjikë të Shteteve të Bashkuara, do të fluturojnë përmes qiejve miqësorë të Europës Juglindore për të ardhur drejt Shqipërisë.
