Jeton Lami, agjent i Forcës Operacionale në Policinë e Shtetit, u arrestua dje pasi Gjykata ka dhënë ndaj tij masën e sigurisë “Arrest me burg” për veprën penale të “Shpërdorimit të detyrës”. 28 vjeçari ka përkrahur dhe transportuar një person shumë të kërkuar.
Agjenti i Drejtorisë së Forcës Operacionale ka pasur kontakte dhe shoqëri me biznesmenin Ervis Martinaj, i cili është shpallur në kërkim nga SPAK. Gjithashtu, për këtë shtetas është regjistruar dhe një procedim penal “për rrëmbim”, pasi familjarët kanë denoncuar zhdukjen në Polici.
Nga hetim rezulton se 28 vjeçari e ka transportuar Martinajn disa herë nga Lezha në Laç apo në Shkodër gjatë kohës që ai ka qenë në kërkim. Pra, agjenti i Operacionales edhe pse e dinte se biznesmeni i basteve ishte në kërkim, është shoqëruar me të dhe e ka ndihmuar të lëvizë në disa qytete.
Ndërkohë, një tjetër efektiv policie dyshohet se është përfshirë në të njëjtën veprimtari në kundërshtim me detyrën, shkruan newsbomb.al. Mësohet se një special i Forcave RENEA është larguar nga Reparti elitë i Policisë shqiptare dhe është “degdisur” në një Komisariat periferik.
Emri i tij nuk bëhet me dije pasi institucionet ligjzbatuese nuk e kanë faktuar ende plotësisht rolin e tij në shoqërimin e një personi me rrezikshmëri të lartë shoqërore. Policia ka informacione operative se efektivi i Forcave Speciale shoqëronte ish-numri dy i Bandës së Durrësit Endrit Dokle.
Ky i fundit është kundërshtar i biznesmenit Ervis Martianaj dhe sipas dëshmisë së të penduarit të drejtësisë Nuredin Dumani, Martinaj i kishte ofruar 500 mijë euro për “kokën” e Dokles. “Ushtari” i Dumanit ka rrëfyer para SPAK planin për të vrarë ish-numrin dy të Bandës së Durrësit.
