Svetlana Timofoeva është 33-vjeçarja ruse e cila u raportua nga autoritetet shqiptare si një nga tre personat e arrestuar të shtunën, pasi kishin tentuar të hynin në uzinën ushtarake të Gramshit, duke lënduar edhe dy efektivë të Forcave të Armatosura të Shqipërisë.
Euronews Albania ka intervistuar njërin nga shokët e saj. Mikhail Kurylev ka rrëfyer ekskluzivisht se ai është ngjitur me shtetasen ruse në 2018 në Sevastopol, ndërkohë janë futur bashkë në bunkere të vegjël në atë zonë.
Teksa e cilëson një mike të tij, ai nënvizon se Svetlana Timofoeva nuk është spiune, por e apasionuar pas eksplorimit të zonave.
“Unë dhe Lana njihemi që nga viti 2018. Jemi njohur në rrjetet sociale, njoh edhe ish-të dashurin e saj. Jemi miq. Jo jo ajo nuk është spiune sepse e njoh këtë vajzë edhe prej miqve të mi rusë në Moskë. Unë njoh shumë prej miqëve të saj, të cilët kanë të njëjtin pasion, eksplozimin urban”, tregoi ai.
Sa i përket makinës me të cilën 2 rusët dhe ukrainasi udhëtonin në Shqipëri, Kurylev tha se ky mjet është në pronësi të shtetasit ukrainasit.
“Ajo është makina e ukrainasit, i njohur për eksporimet e tij urbane. Nuk e njihja në fakt ukrainasin në jetën reale, por shokët e mi e njohin”, tregoi ai.
Kurylev tha se spray që u përdor ndaj ushtarëve në uzinën e Gramshit nuk është i jashtëligjshëm në Rusi dhe Ukrainë. Ai shpjegoi për gazetarin Xhensil Shkëmbi se ky lloj spray përdoret për të sulmuar kafshët e egra dhe njerëzit agresivë.
“Në Rusi në kemi disa spray që përdoren për të sulmuar kafshët e egra dhe njerëzit agresivë. Ky është gazi, unë kam një të tillë në shtëpi, nuk është ilegal në Rusi dhe Ukrainë”, u shpreh i riu.
Pyetjes se ku i siguron paratë rusja për të bërë udhëtime, miku i saj u shpreh se ajo përfiton para nga ekskursionet që zhvillon, kryesisht në Gjeorgji.
