Gazetarja Klodiana Lala ka bërë një deklaratë të fortë mbrëmjen e sotme, në lidhje me zhdukjen e Ervis Martinajt, të shumëkërkuarit nga policia.
Lala deklaroi në emisionin “Opinion” se disa kohë më parë e ka takuar Martinajn në prani të një ish-deputeti.
Megjithatë, ajo nuk pranoi të tregojë emrin e ish-deputetit dhe deklaroi se nuk e di se përse ata ishin bashkë.
“E kam takuar në prani të një ish-deputeti të njohur. Nuk e di çfarë bënte me të deputeti, punë për të”, u shpreh gazetarja. Ajo zbuloi se Martinajn shkoi ta takojë për t’i kërkuar një intervistë, por ky i fundit nuk kishte pranuar.
Nga ana tjetër, gazetari Artan Hoxha u shpreh se Martinaj ishte me pushime në Dhërmi.
Hoxha shtoi se u habit kur ka zbuluar se me kë ishte ai.
“Besimi i familjarëve tek Policia është 0. Kamerat i kanë gjetur familjarët, ato që kanë dalë deri më tani. Janë kamerat e tyre. Ato i kanë ndjekur lëvizjet e tij. Më 1 gusht, ne jemi takuar bashkë në rivierë. Ai ka qenë në Dhërmi. Nga data 1-5 ka qenë në Dhërmi dhe ka bërë pushime. Jam habitur kur e kam marrë vesh me kë ka qenë. Me datë 5 erdhi në Durrës. Pastaj në Tiranë.”, deklaroi gazetari.
