Kampionatet po vazhdojnë me një ritëm të ‘çmendur’, dhe ndërkohë që kalendari vazhdon të mbingarkohet, lodhja tek lojtarët po i tregon shenjat e para. Në Premier League, Tottenham dhe Chelsea fitojnë, kurse ekipet pretendente si Man City e Liverpool dalin “huq” duke barazuar në sfidat e tyre.
Në LaLiga, Reali dhe Barcelona kryejnë detyrën, kurse Atletico Madrid ngec në barazim ndaj Sociedad.
Në kampionatin italian të Seria A, Milani mposhti Interin, Napoli mposhti Lazion, dhe nga ana tjetër Juve e mbylli në barazim sfidën ndaj Fiorentinës.
Pikërisht rezultatet e këtyre skuadrave do të jenë kryefjalë e mediave për ditën e sotme.
Ndjekim disa nga titujt kryesorë të mediave sportive:
La Gazzetta dello Sport hapet me yllin portugez të Milanit “Ultra Leao”. Milan gjunjëzon Interin, me protagonist Leaon i cili shënoi dy gola fantastikë.
“Dy Djaj” është titulli kryesor i Corriere dello Sport. Leao dhe Kvara fenomenale: ata e çojnë Milanin dhe Napolin në krye.
Tuttosport hapet me bardhezinjtë duke shkruar: “Allegri duhet të bësh më shumë”. Goli i Milik nuk mjafton, Fiorentina barazon dhe dominon pjesën e mbetur të lojës.
“Bernabéu vazhdon të festojë” shkruan e përditshmja madrilene AS. Madridi mbetet i vetëm në krye të LaLiga me fitore të plota pasi mposhti Betisin.
Katalanasja Mundo Deportivo hapet me paraqitjen fantastike të Blaugranave: “Ole Barça”. Barcelona merr fitoren e tretë radhazi duke mposhtur Sevillan me rezultat 0-3 dhe konfirmon linjën e tyre të mire.
“Një lider me frekuencë” është titulli i prestigjozes Marca. Një Madrid solid e rrëzon Betisin në ritmin e Rodrygos.
Sport si zakonisht hapet me katalanasit duke e quajtur paraqitjen e tyre si “Ekspozitë”. Barcelona ishte një tank në Sevilje dhe vazhdon të tregojë se është perfekte.
Në Britaninë e Madhe, Express Sport hapet me titullin “Duke parë të kuqe”. Lampard u shpreh i pakënaqur nga arbitri i ndeshjes pasi ai nuk e ndëshkoi Van Dijk me karton të kuq pas një faulli horror.
