Kryeministrja e Serbisë Ana Brnabiç, ka mbërritur mesditën e kësaj të hëne në veri të Kosovës, në Mitrovicën e Veriut. Ajo është pritur nga serbët atje me flamuj e ovacione, duke qenë se vizitonte Kosovën për herë të parë si kryeministre.
“Mirë se vjen në tokën e shenjtë serbe”, shkruhet në disa prej pankartave që mbajnë në duar serbët e Kosovës, ndërkohë pranë vendit ku po mbahet takimi i Brnabiç janë patrulla të KFOR dhe Policisë së Kosovës për të ruajtur sigurinë.
“Për të mundësuar qarkullim të lirë të eskortës zyrtare nën përcjellje dhe sigurim sipas itinerarit të lëvizjes, Policia e Kosovës do të bëjë ndërprerje të përkohshme të qarkullimit të trafikut (në intervale të shkurta kohore), të disa segmenteve rrugore ku pritet të kalojë eskorta, si dhe në lokacione të caktuara ku parashihen të realizohen aktivitete”, thuhet në njoftimin e policisë.
Së bashku me kryeministren serbe, Mitrovicën e Veriut e viziton edhe drejtori i të ashtuquajturës Zyre për Kosovë, Petar Petkoviç. Sipas Qeverisë së Serbisë, Ana Brnabiç fillimisht do të ndalet në Mitrovicën e Veriut, ku do të vizitojë qendrën e parë multimediale në veri të Kosovës.
Pas kësaj është planifikuar një vizitë në Manastirin e Banjskës në komunën e Zveçanit e Zubin Potokun.
