Një grua ka pësuar lëndime të rënda teksa po luftonte me një tigër për të shpëtuar foshnjën e saj 15-muajshe.
Gruaja u përball me tigrin me duar për disa minuta para se fshatarët të dëgjonin thirrjet e saj për ndihmë dhe të ndërhynin. Nëna dhe djali ndodhen në spital ku po marrin trajtim mjekësor.
Sulmi ndodhi të dielën në periferi të Rezervës së Tigrave Bandhavgarh. Sulmet e kafshëve ndaj njerëzve që jetojnë rreth rezervatit të tigrave nuk janë të rralla.
Fshatarët thanë për BBC Hindi, se përveç tigrave, në fshatrat e tyre kanë hyrë edhe elefantët dhe kanë dëmtuar të korrat e tyre.
Në të gjithë Indinë, njerëzit që jetojnë në zona afër pyjeve dhe parqeve kombëtare janë sulmuar nga kafshët.
Ekspertët thonë se kjo është për shkak se urbanizimi i shpejtë po shkatërron habitatet natyrore, duke i detyruar kafshët të hyjnë në fshatra dhe qytete në kërkim të gjahut dhe strehimit.
Në sulmin e fundit, gruaja, Archana Choudhary, dhe vogëlushi i saj ishin në një fushë kur një tigër doli nga shkurret dhe sulmoi foshnjën.
Times of India raportoi se tigri kishte zhytur dhëmbët në kokën e foshnjës dhe po përpiqej ta tërhiqte fëmijën kur nëna ndërhyri dhe u përball me kafshën.
Britmat e saj për ndihmë u dëgjuan nga fshatarët në zonat e afërta, të cilët arritën në vend me shkopinj dhe përzunë tigrin.
Nëna raportohet se ka dëmtime në mushkëri dhe ka marrë plagë të thella në trup ndërsa djali i saj ka plagë në kokë.
Një mjek tha për BBC Hindi se plagët në trupin e fëmijës nuk ishin serioze, ndërsa të nënës po.
