Air Albania ka reaguar në lidhje me lajmet e publikuara së fundmi në media ku QKB pezulloi aktivitetin e tyre pasi nuk kishin deklaruar pronarët fitues.
Në një reagim zyrtar shoqëria e fluturimit “Air Albania” ka njoftuar pasagjerët se fluturimet do të vijojnë me të njëjtin ritëm pasi nuk bëhet fjalë për pezullim të aktivitetit tregtar, por me një procedurë administrative.
Më tej në deklaratë theksohet fakti se ky sezon ka qenë mbi pritshmëritë vjetore.
“Air Albania dëshiron të njoftojë të gjithë pasagjerët, se operacionet vazhdojnë me të njëjtin ritëm energjik, ku vetëm në këtë sezon fluturimesh kemi regjistruar shifra të reja mbi pritshmëritë vjetore.
Në përgjigje të njoftimeve të fundit mediatike, gjejmë rastin të sqarojmë publikun se nuk bëhet fjalë për pezullim aktiviteti tregtar, por me një procedurë administrative, ku aksioneri kryesor, operatori global i industrisë së aviacionit civil, Turkish Airlines, duhet të paraqesë kredencialet e kërkuara nga Qendra Kombëtare e Biznesit në Shqipëri, procedurë e cila është drejt përmbushjes”, thuhet në deklaratë.
