Artisti Alkent Pozhegu, është i njohur për rekordet Guiness, për portretet me drithëra, madje ai ka marrë vëmendjen e medieve prestigjioze të botës.
Së fundmi, ai ka punuar portretin e Mbretëreshës Elizabetha e Dytë të shtunën në nderim të personalitetit të saj në botë dhe në Kosovë. Kësaj here ai e vendosi jo vetëm artin, por edhe emocionet e veta në portretin e Mbretëreshës, me të cilin pretendon të marrë Guiness.
“Ka qenë ndër të paktat çka unë kam mundur ta realizoj me këtë mozaik sepse mbretëresha e Anglisë ka qenë një grua jashtëzakonisht e shkëlqyer, një burrneshë që ka kontribuar shumë për Anglinë dhe sidomos për Kosovën. Që e kemi pasur një mbështetje të madhe si gjatë luftës dhe pas luftës, të jemi falënderues”, ka thënë Pozhegu.
Ai ka tri rekorde të regjistruara Guinness, në vitin 2014 me portretet e futbollistëve Cristiano Ronaldo dhe Leo Messi, në vitin 2017 me këngëtaren britanike me prejardhje shqiptare, Rita Ora dhe në vitin 2019 me portretin e ish-presidentit të Shteteve të Bashkuara të Amerikës, Donald Trump.
Sakaq, vdekja e Mbretëreshës Elizabetha e Dytë ka nxitur reagime në Kosovë. Liderët e vendit kanë përkujtuar jetën e Mbretëreshës, ashtu siç kanë bërë edhe njerëzit e zakonshëm nëpër rrugët e Kosovës.
