Ish-presidentët e Shqipërisë, Alfred Moisiu, Rexhep Meidani, Bamir Topi, si dhe ish-kryeministri, Pandeli Majko do të vizitojnë në Hagë të akuzuarit e Gjykatës Speciale të Kosovës. Kështu delegacioni shqiptar do të takohet me Hashim Thaçin, Kadri Veselin, Jakup Krasniqin, Rexhep Selimin si dhe Salih Mustafën.
Iniciatori dhe sponsor i kësaj vizite është Kryetari i Aleancës Kosova e Re, Behgjet Pacolli. Madje, ky i fundit shprehet se në këtë udhëtim ka ftuar edhe ish-presidentët e Kosovës, por krerët e shtetit ende nuk i janë përgjigjur.
Kujtojmë se më herët nga Shqipëria ka qenë kryeministri Edi Rama ai që ka zhvilluar një vizitë në Hagë. Ndërkohë, nga Kosova ata janë vizituar nga krerët fetarë të Kosovës dhe kryetari i Kuvendit, Glauk Konjufca.
Ish-krerët e UÇK janë duke u mbajtur në qendrën e paraburgimit të Dhomave të Specializuara në Hagë për akuzat për krime lufte dhe krime kundër njerëzimit.
