Presidenti amerikan Joe Biden jo pak herë është vendosur në qendër të vëmendjes për momentet e çuditshme dhe të sikletshme në të cilat gjendet në fjalimet dhe daljet e tij publike.
Kështu ka ndodhur edhe gjatë një fjalimi që ai po mbante gjatë Konferencës së Shtëpisë së Bardhë për Urinë, Ushqyerjen dhe Shëndetin në Uashington. Teksa po fliste, Biden i kërkoi turmës të nxirrnin në skenë kongresmenen Jackie Walorski, teksa në fakt kjo e fundit ka ndërruar jetë një muaj më parë, pas një aksidenti.
“Jackie, a je këtu? Ku është Jackie?” pyeti presidenti.
“Ajo nuk qenka këtu”, përfundoi ai, ndërsa turma e shikonte e habitur.
Shtëpia e Bardhë kishte planifikuar gjithashtu të luante një video homazh për të, por duket se për shkak të këtij incidenti planet ndryshuan dhe videoja nuk u shfaq.
Walorski ishte ndër katër personat e vrarë në një aksident automobilist, më 3 gusht 2022 teksa po kthehej nga një ceremoni inaugurimi në Claypool, Indiana.
