Pas bombardimeve që Rusia po i bën Ukrainës si shenjë hakmarrjeje për urën e goditur në Krime, Shqipëria e ka cilësuar si një akt të pastër terrorist e që tregon hapur fytyrën e vërtetë të Vladimir Putin.
Në reagimin zyrtar, Shqipëria thekson se qëndron krah Ukrainës përballë këtij agresioni të paligjshëm, duke theksuar se janë të bindur që Rusia nuk do ia arrijë që qëllimit.
“Sulmet e Rusisë kundër civilëve në disa qytete të Ukrainës, përfshirë edhe Kievin, janë një akt i qartë terrorist. Kjo është natyra e vërtetë e luftës së Rusisë dhe Putinit kundër Ukrainës. Brutaliteti dhe terrori nuk e kanë ndihmuar aspak Rusinë përballë rezistencës heroike të Ukrainës. As këtë herë nuk do të ndodhë. Shqipëria qëndron përkrah Ukrainës ndaj këtij agresioni të paligjshëm”, thuhet në reagim.
Dje Moska ka lëshuar 83 raketa në të gjithë Ukrainën, ku deri më tani janë raportuar për 11 persona të vrarë dhe 64 të plagosur. Në një lidhje direkte, Putin pranoi që sulmet vijnë si hakmarrje nga shpërthimet në urën e Krimesë ndërsa paralajmëroi përgjigje të ashpër ndaj çdo provokimi.
