Mjekja pediatre, Valbona Shahinaj ka qenë e ftuar mëngjesin e sotëm në emisionin “Good Morning Albanians”.
Gjatë diskutimeve, Shahinaj nënvizoi se shurupet e kollës, por edhe çdo produkt në farmaci duhet të jepet me recetë për moshat e vogla, sidomos 0-1 vjeç.
Ajo shtoi se në disa raste ka parë receta, në të cilat doza ka qenë e gabuar.
“Është një situatë që na ndodh shumë shpesh, marrja e ilaçeve në farmaci ndodh, është situatë mëse e zakonshme, sidomos për shurupe kolle. Është normale që shkojnë në farmaci, konsultohen, nuk është diçka e gabuar. Por në disa mosha pak më specifike, unë do të isha shumë e kujdesshme, sidomos për moshat nën 1 vjeç.
Ato produkte që ne japim duhet të jenë të studiuara deri në detaje. Kemi parë receta që kanë qenë me doza të gabuara. E mira është që shurupet të jenë me recetë, çdo gjë të merret me recetë, sidomos për moshat e vogla, të paktën 0-1 vjeç”, theksoi ajo.
OBSH ka ngritur alarmin për 4 shurupe për fëmijë të cilët kanë rezultuar të kontaminuara.
Katër produktet mjekësore janë solucioni Oral Promethazine, shurupi i kollës për fëmijë Kofexmalin, shurupi i kollës për bebe Makoff dhe shurupi Magrip N Cold.
Analiza laboratorike e mostrave të secilit prej produkteve konfirmon se ato përmbajnë sasi të papranueshme të dietilen glikolit dhe etilen glikolit si ndotës. Deri më sot, këto katër produkte janë identifikuar në Gambia, por mund të jenë shpërndarë, nëpërmjet tregjeve informale, në vende ose rajone të tjera.
