Deputetja demokrate Grida Duma ka dalë në mbështetje të qeverisë për amnistinë fiskale.
Nëse bëhet për fëmijët e shqiptarëve, tha ajo, mund t’i bashkohet votave të socialistëve.
Por sipas Dumës qëllimi i nismës së propozuar nga Edi Rama nuk bëhet për emigrantët por për të ashtuquajturit investitorë strategjikë.
“Ne kemi takime të shpeshta me ndërkombëtarët, shqetësimet e tyre na i kanë bërë të ditura, që amnistia fiskale është në dëmtim të Shqipërisë, në rrugën e integrimit dhe për vendin. Kjo është ajo që na kanë prezantuar. Ne duhet të na paraqitet ky draft i famshëm, të cilin FMN-ja e ka kthyer mbrapsht duke thënë se ajo që na është paraqitur ka probleme të mëdha.
Në dijeninë time, këto janë biseda në korridore, i është kërkuar qeverisë që të ripërcaktojë termat e referencës për amnistinë.
Në qoftë se e ka vërtetë për paratë e emigrantëve të cilat duhet të investohen në Shqipëri, sepse ata që kanë punuar në punë të zezë, nuk kanë pasur mundësi t’i legalizojnë në vendin e tyre, ne nuk mund të jemi kundër emigrantëve tanë. Por drafti nuk është për ata, është për pika të errëta të investitorëve strategjik”, tha Duma.
