Të paktën 11 rekrutë raportohet se janë vrarë në një bazë trajnimi në Rusi, pasi dy persona kanë hapur zjarr.
Gazeta ruse “Baza” raportoi e para se dy persona të armatosur, hapën zjarr duke qëlluar me kallashnikov drejt vullnetarëve që po trajnoheshin në një qendër në Belogrod, në kufi me Ukrainën.
11 persona humbën jetën dhe 15 të tjerë mbetën të plagosur nga breshëria e plumbave, ndërsa autorët u vranë në vendngjarje, sipas Ministrisë së Mbrojtjes ruse që e quajti ngjarjen si “akt terrorist”.
“Një ngjarje e tmerrshme ka ndodhur në territorin tonë, në territorin e një prej njësive ushtarake,” tha guvernatori i rajonit të Belgorodit Vyacheslav Gladkov.
“Shumë ushtarë u vranë dhe u plagosën. Nuk ka banorë të rajonit të Belgorodit midis të plagosurve dhe të vrarëve,” tha Gladkov në një postim në aplikacionin Telegram.
Pavarësisht shifrave zyrtare, disa media ruse raportuan se numri i viktimave është të paktën 22.
Ushtarët ishin në fazën e fundit të trajnimit përpara se të niseshin për të luftuar në qytetin e Iziumit në Ukrainë, ndonëse ata vazhdimisht kishin kundërshtuar.
