Pasi Shqipëria ra pre e sulmeve nga Irani, Ministri i Brendshëm, Bledi Çuçi bëri me dije se përveç buxhetit 2023 me 547 mln lekë, edhe AKSHI do financojë me fondet e veta për mbrojtje kibernetike. Në Komisionin për Sigurinë Kombëtare, theksoi se për të rritur sigurinë në rrugë, në buxhetin e Ministrisë së Infrastrukturës është parashikuar vendosja e sistemit të kamerave në rrugët kombëtare.
Nga aty, ai foli edhe për vdekjen e Lear Kurtit, që ndërroi jetë gjatë shoqërimit në komisariat.
Çuçi zgjodhi të mos japë një përgjigje konkrete për numrin e personave që kanë humbur jetën në duart e policisë apo në komisariate. Ai u shpreh se nuk do të japë një numër statistikë.
Ndër të tjera foli për fondin për kamerat e trupit tek efektivët duke thënë i përballueshëm brenda buxhetit 2023.
“Nuk është thjesht statistikë, kërkon një metodologji të saktë dhe nuk dua të spekuloj për të dhënë një numër statistikë në rastin që nuk është e qartë”, tha Çuçi.
