Sadio Mane është një futbollist i jashtëzakonshëm dhe një person i rrallë. Senegalezi i dha fund aventurës 6-vjeçare me Liverpoolin në verë dhe zgjodhi të vijonte karrierën te Bayern Munchen.
Sulmuesi është përshtatur për mrekulli tek ekipi i Nagelsmann dhe deri në këtë fazë të sezonit numëron 11 gola dhe 3 asiste në gjithë kompeticionet.
Fitorja 6-2 ndaj Mainz, aty ku regjistroi një gol dhe dy asiste, ka ngjitur bavarezët përkohësisht në krye të renditjes, ndërkohë që Mane vijon të shfaqet i përulur dhe modest.
Edhe pse ka 30 vite mbi supe, goleadori afrikan deklaroi për Kicker se ai gjithmonë tenton të përmirësohet dhe të rrisë rendimentin e tij.
“Unë jam një lojtar që punon për ekipin Gjithmonë përpiqem të shënoj, dhuroj asiste dhe të fitoj ndeshje. Por, unë e di që mund të përmirësohem gjithmonë, në çdo aspekt, mund të jap edhe më shumë nga vetja.
Mendoj se mund të përmirësohem ende shumë në lojën time, në të dy fazat e lojës: si në mbrojtje ashtu edhe në sulm.
Si skuadër jemi në rrugën e duhur, javët e fundit kanë qenë shumë pozitive për ne, por duhet të vazhdojmë të punojmë fort dhe të jemi të përqendruar”, deklaroi Sadio Mane.
