Tirana mbetet epiqendra e Primareve në PD, ku shtatë kandidatë pritet të garojnë mes tyre brenda partisë, ku më i votuari do të jetë përballë Erion Veliajt në zgjedhjet e 14 majit. Gjithashtu edhe në bashkitë e tjera kanë dalë disa emra, por ende nuk është mbyllur procesi.
Të gjitha bashkitë janë të rëndësishme të fitohen nga secila palë, nga socialsitët dhe demokratët, por Tirana mbetet sfida e madhe e garës. Të garosh kundër Erion Veliajt nuk është aq e thjeshtë, pasi përveçse gëzon një logo të madhe nga pas, si përfaqësues i PS-së, ka mundur të krijojë edhe staturën e tij, pozitive apo negative mbetet për tu parë nga befasia që do të dalë nga kutitë e vitimit më 14 maj. Gjithsesi askush nuk mund ta mohojë se Veliaj është i fortë dhe për të mundur një të fortë më së paku opozita duhet të ketë dy favore: një kandidatët të denjë, që të tërheqë edhe elektoratin gri dhe e dyta opozita të jetë e bashkuar. Nëse për të parin mundësitë janë për të përzgjedhur një nga shtatë personat e vetëofruar për të kandiduar në Primave, e dyta mbetet ende utopi. Partia Demokratike ka dy emra të njohur relativisht që është Gerti Bogdani, ish- kryetar minimashkie me ndarjen e vjetër territoriale dhe ish deputet dhe Blendi Këlliçin, të cilin Berisha po e promovon shumë, sidomos pas shkëputjes së tij nga Basha dhe uljes në “divanin” e Berishës. Gara e primareve të Tiranës tashmë ka gjashtë emra, Belind Këlliçin, Gert Bogdanin, Ilir Alimehmetin, Adriana Kalanë, Enkelejda Fejzon, dhe Fatmir Merkoçin dhe Julian Dedën. Terreni në selinë blu deri më tani duket se po përgatitet për Belind Këlliçin, por edhe dy kandidaturat e tjera, mjeku Ilir Alimehmeti dhe Gerti Bogdani mbesin kandidatë të fortë brenda PD-së. Paradoksalisht edhe në këto primare rëndësi do ketë vota e Berishës, sepse i preferuari i tij mund të kthehet dhe në t “preferuarin” e anëtarësisë.
Primaret për bashkitë
Në Korçë, mjeku Gjergji Gjata ka shpallur kandidaturën për në primaret e Partisë Demokratike për të qenë ai kandidati i opozitës në zgjedhjet vendore të 14 majit. Nga grupseksionet e PD janë propozuar edhe emrat e Ledina Alollit, deputetes Eleina Qirici, Rektorit të Universitetit “Fan Noli” Dhimitri Bello dhe Irvin Bode, por deri tani asnjë tjetër nuk ka konfirmuar nëse do të jetë pjesë e garës së brendshme në PD. Për Pogradecin emrat e propozuar nga baza janë: Genti Çela, Zihni Tollozhina, Eduart Kapri, Oligert Muçllari dhe Bajram Fezollari.
6 nëntori ishte afati përfundimtar për të depozituar kandidaturat për primaret e demokrateve për bashkinë e Tiranës, Durrësit dhe Elbasanit. Evdar Kodheli është kandidati i parë që konfirmon pjesëmarrjen e tij në garën për Primaret në qarkun e Fierit. Ai shprehet se ka vendosur të kandidojë pasi e ndjen si detyrim qytetar dhe politik, ndërsa shton se gara është ajo që përzgjedh më të mirin, dhe të kaulifikuarin për të bërë ndryshimin e duhur. Për Durrësin afati është shtyrë deri më 8 nëntor. Deri tani kandidatura të mundshme janë ajo e kryetarit të degës Igli Cara dhe Ardian Mukës që kandidoi në zgjedhjet e pjesshme të 6 marsit. Për Bashkinë e Elbasanit 2 kandidaturat që pritet të prezantohen sot janë kreu i degës, Bledi Himçi dhe ish-kryetari Aurel Bylykbashi.
