Grida Duma tashmë është ish-deputetja e Partisë Demokratike. Duma njoftoi se ka dorëzuar mandatin e deputetes. Ndonëse nuk foli për planet në të ardhmen, pritet që zonja Duma të drejtojë një emision politik në Top Channel.
Ndërsa është tashmë në një emision, moderatorja Ori Nebiaj, ka shansin të kalojë në Kuvend, pasi mandati i Duma, i kalon asaj. E pyetur nga gazeta “Panorama”, ajo ka konfirmuar se do të pranojë mandatin.
Nebiaj kandidoi më 25 prill në qarkun e Tiranës, ku mori 5606 vota preferenciale. Nebiaj ishte renditur e 18 në listën e PD-së në qarkun e Tiranës, por pas rirenditjes në bazë të votave preferenciale ajo u ngjit një vend më sipër.
Megjithatë, para saj në radhë ishte Petrit Doda, por me ndryshimet e fundit të Kodit Zgjedhor, mandatin e ligjvënësit që lë një grua e merr po një grua. Pas aktit të znj. Duma, pritet të mblidhet Këshilli i Mandateve në Kuvend për të shpallur vakancën. Vakanca i dërgohet Komisionit Qendror të Zgjedhjeve, i cili brenda 48 orëve bën zëvendësimin. Ndërkohë, sot pritet që të depozitojë dorëheqjen edhe Alfred Rushaj.
