Prej pak kohësh, Dua Lipa është përfolur gjerësisht nëpër media si një nga këngëtaret që do të performojë në ceremoninë hapëse të Kupës së Botës nga FIFA. Në një postim në Instagram, Dua hodhi poshtë spekulimet dhe në të njëjtën kohë kritikoi politikat e Katarit.
“Ka shumë spekulime se unë do të performoj në ceremoninë hapëse të Kupës së Botës në Katar. Unë nuk do të performoj dhe nuk kam qenë e përfshirë në ndonjë negociatë për të performuar,” shkroi ajo. “Do të përkrah Anglinë nga larg dhe do ta vizitoj Katarin kur të përmbushë të gjitha të drejtat e njeriut, për të cilat u zotua kur fitoi të drejtën për të mirëpritur Kupën e Botës.”
Katari, ku do të mbahen ndeshjet e futbollit për Kupën e Botës 2022, ka qenë në qendër të kritikave për abuzimet me të drejtat e njeriut. Në mbarë botën kanë nisur fushata që synojnë të denoncojnë shqetësimet mbi të drejtat e grave, ligjet e vendit të cilat kriminalizojnë marrëdhëniet brenda të njëjtit seks, trajtimin e punëtorëve emigrantë që ndërtojnë projekte me vlerë dhjetëra miliarda dollarë dhe ndikimin mjedisor të organizimit të një turneu në stadiume me ajër të kondicionuar.
