Tiffany Trump ka kurorëzuar dashurinë mbrëmjen e djeshme me Michael Boulos në Palm Beach, Florida. Tiffany, 29 vjeç, është vajza e ish-presidentit Donald Trump dhe aktores Marla Maples , të cilët ishin të martuar nga viti 1993 deri në 1999.
Në këtë dasmë të madhe ishte i ftuar dhe politikani e biznesmeni kosovar Behgjet Pacolli. Ai shpërndau një video në rrjetet sociale, ku shkruan se ishte i lumtur të merrte pjesë në dasmën e vajzës së ish-presidentit Trump.
Mirëpo, nuk ka qenë vetëm ai. Edhe sipërmarësi i njohur kosovar, Shkëlqim Devolli, bashkë me bashkëshorten Blerina, kanë qenë të ftuar të nderit në dasmën e familjes së ish-Presidentit të Shteteve të Bashkuara të Amerikës, Donald Trump.
“Ishte një kënaqësi krejt e veçantë që mbrëmë, së bashku me Blerinën, ishim pjesë e gëzimit familjar të Presidentit Trump. Ndjehemi shumë të nderuar të ishim ndër të ftuarit për martesën e Tyffanyt dhe Michaelit, në këtë dasmë tipike amerikane”, është shprehur afaristi Devolli.
Ai ka treguar se në dasmë ka pasur rastin të takohet edhe me njerëz me ndikim në nivelet më të larta të politikës, ekonomisë dhe shoubiznesit amerikan, përfshirë edhe senatorë dhe kongresistë.
Dasma e Tiffany Trump dhe Michael Boulos po vlerësohet si një ndër dasmat më të bujshme të vitit, ku të ftuar kanë qenë ndër njerëzit më të rëndësishëm në SHBA dhe jashtë saj.
