Ish-kongresmenja braziliane dhe këngëtarja e gospel-it, Flordelis dos Santos de Souza, u dënua me 50 vjet e 28 ditë burg pasi u shpall fajtore për planifikimin e vrasjes së burrit të saj, pastorit Anderson do Carmo i cili u qëllua për vdekje në vitin 2019, në shtëpinë e tyre në Rio de Zhaneiro.
61-vjeçarja dhe bashkëshorti i saj shiheshin si një çift i fuqishëm në mesin e lëvizjes së krishterë ungjillore të vendit dhe ishin gjithashtu të famshëm për 55 fëmijët e tyre, shumica e të cilëve janë birësuar nga lagjet e varfëra në Rio de Janeiro. Dënimi u dha në një gjykatë në Rio pasi ajo dhe disa nga fëmijët e tyre u akuzuan gjithashtu si bashkëpunëtorë në vrasjen e pastorit.
Do Carmo, në vitin 2019, u qëllua të paktën 30 herë në garazhin e shtëpisë së tyre në Rio, pas së cilës dos Santos pretendoi se hajdutë të armatosur me motoçikleta i kishin ndjekur dhe sulmuan burrin e saj. Në vitin 2020, prokurorët akuzuan Dos Santos për “planifikimin e vrasjes, përfshirjen për të marrë pjesë në krim dhe përpjekjen për ta maskuar atë si një grabitje të armatosur“. Ata gjithashtu dyshuan se kjo lëvizje ishte bërë për të marrë kontrollin mbi financat e çiftit të cilat kontrolloheshin nga Do Carmo, shkruan wionews.
Ajo gjithashtu kishte provuar të helmonte burrin e saj të ndjerë me cianid të paktën gjashtë herë përpara se të organizonte vrasjen e tij, thuhet në raportin e hetimeve. Simone dos Santos Rodrigues, vajza biologjike e ish-kongresmenes u dënua me 31 vjet burg dhe një nga djemtë e saj biologjikë u shpall fajtor si një person i armatosur që qëlloi pastorin, është dënuar me 33 vjet burg. Katër nga fëmijët e saj të birësuar dhe një mbesë u dënuan gjithashtu në fillim të këtij viti gjatë gjyqit.
