“Njerëz dhe fate”, seriali i famshëm i viteve 2000, do të rikthehet. Të paktën këtë la të nënkuptuar aktori Arben Derhemi në postimin e fundit në Instagram.
Si një mbishkrim në selfie-n me Nderin e Kombit, Robert Ndrenikën, Derhemi shkroi: “Sot e deklaroj rifillimin e serialit ‘Njerëz dhe fate’. Është gati.”
Aktori, të cilit “Flori” i është bërë si një emër i dytë, nuk zbuloi të tjera detaje, por në Instagram vihet re se ka pëlqyer çdo koment që i uron suksese me serialin.
Rikthimi i serialit është diskutuar edhe më parë. “Ishte serial interesant sepse trajtonte tema të cilët shqiptarët po i përjetonin asokohe. Është diskutuar dhe po diskutohet për një rikthim të “Njerëz dhe Fate”, por ende nuk kemi një përgjigje,” tha në vitin 2017 aktorja Eni Jani, e cila luan personazhin e Erës, motra e Florit.
“Njerëz dhe fate” korri një sukses të jashtëzakonshëm në fillim të viteve 2000. Seriali “gozhdoi” asokohe shqiptarët para televizorit të cilët prisnin me ankth çdo të ndodhte me familjen e famshme të Florit.
