Një fëmijë i mitur ka humbur jetën nga temperature e lartë.
Ai kishte temperaturë për ditë të tëra, më pas gjendja e tij u përkeqësua papritur deri në atë pikë sa pësoi një arrest kardiak, i cili rezultoi fatal për djalin 10-vjeçar banues në Legnano (në rrethinat e Milanos).
Sipas mediave italiane, i mituri u dërgua në urgjencë nga familja e tij rreth orës 7 të mëngjesit, por përkeqësimi ndodhi pikërisht gjatë rrugës për në spitalin e qytetit.
Mjekët u përpoqën për rreth dyzet minuta, por më pas u dorëzuan dhe lajmëruan prindërit për vdekjen e fëmijës.
Sot dhe nesër do të kryhet autopsia për të zbardhur shkaqet e vdekjes së pacientit në moshë shumë të re, i cili mesa duket nuk kishte simptoma të tjera përveç rritjes së temperaturës.
Në këtë periudhë janë në rritje rastet e gripit, i cili prek shpesh fëmijët.
Alessandro Rossi, kreu i sëmundjeve infektive, nënvizoi se “këtë vit epidemia e gripit ka arritur nivele të larta. Rastet me të cilat kemi hasur ne mjekët e familjes janë të shumta, sidomos në mesin e të rinjve dhe fëmijëve”.
