Ethet e Botërorit kanë përfshirë tifozët e futbollit në gjithë botën duke përfshirë këtu edhe Shqipërinë. Në kryeqytet prej një jave është krijuar atmosfera “Fan Zone” në Sheshin Skënderbej ku të shumtë janë qytetarët që shijojnë ndeshjet e botërorit “Katar 2022” në ekranin e madh.
Megjithatë, duket se Tirana nuk është i vetmi qytet që u jep mundësinë tifozëve të ndryshëm të shijojnë ndeshjet në këtë mënyrë. Në Lushnje, kinoteatri “Vaçe Zela” është shndërruar në një ‘stadium’ për gjithë tifozët e kombëtares gjermane të cilët do të ndeshen sot në një finale të parakohshme kundër Spanjës.
Steriotipi për tifozerinë gjermane në Shqipëri dukej se i takonte Shkodrës, por këtë kampionat botëror është Lushnja në “pole position” përsa i përket tifozëve të shumtë në numër që përkrahin Gjermaninë.
Kinoteatri legjendar “Vaçe Zela” është dekoruar me flamuj të Gjermanisë si dhe postera dhe fotografi të ndryshme të kombëtares së tyre të preferuar. Ndeshja do të shfaqet në ekranin e madh të montuar në skenën e teatrit, ndërsa qytetarët priten të mbërrijnë rreth orës 20:00, atëherë kur do të startojë dhe supersfida Gjermani-Spanjë.
