Komiteti Ndërparlamentar Shqipëri-BE për Stabilizim-Asocimin do të zhvillojë mbledhjen e radhës sot dhe nesër në Bruksel. Eruordeputetët inkurajojnë Shqipërinë të vazhdojë rolin e saj konstruktiv në zhvillimin dhe kultivimin e bashkëpunimit rajonal dhe rolin e saj aktiv në nismat rajonale, duke nënvizuar rëndësinë e gjithëpërfshirjes së tyre.
Europa vijon të jetë e shqetësuar me nivelin e korrupsionit në Shqipëri, luftën ndaj krimit të organizuar dhe lirinë e medias. Kjo duket qartë në dokumentin me draft-rekomandimet e Komitetit Ndërparlamentar të Stabilizim-Asociimit Shqipëri-BE. Drafti pritet të miratohet të enjten dhe kërkon nga autoritetet e Tiranës më shumë rezultate në këto fusha, me një vëmendje të shtuar sa i përket kujdesit ndaj financimeve të partive politike në një vit zgjedhor. “I bëjmë thirrje autoriteteve shqiptare për të vijuar eliminimin e korrupsionit dhe aktiviteteve kriminale, në veçanti në nivelet e larta, nga të gjitha fushat e jetës publike, duke përfshirë nga procedurat e prokurimeve publike deri te financimet e partive politike. Shënim, me shqetësim që Shqipëria ka rënë me 27 pozicione nga 2016 në Indeksin e Përceptimit të Korrupsionit të Transparency International”, thuhet në draftin e rekomandimeve. Ashtu si në çdo raport të institucioneve europiane, edhe kësaj radhe, PE-ja i bën thirrje partive politike për bashkëpunim dhe dialog, sidomos për reformën zgjedhore. “Në këtë aspekt, i bëjmë thirrje për rëndësinë e gjetjes së konsensusit për reformën elektorale, sipas rekomandimeve të OSBE/ODIHR dhe Komisionit të Venecias përpara zgjedhjeve të ardhshme parlamentare, për të forcuar praktikën demokratike të parlamentit shqiptar”, shkruhet në draft- rekomandimeve të Komitit Ndërparlamentar.
Dokumenti vë në pah edhe problemet me lirinë e medias, madje duke i kujtuar qeverisë shqiptare edhe rënien në pozicione në Indeksin e Lirisë së Shtypit. “Shënojmë me shqetësim që Shqipëria ka një rënie me 8 pozicione që nga 2018 në Indeksin e Shtypit Botëror. I bëjmë thirrje Shqipërisë që të intensifikojë përpjekjet për garantimin e lirisë së shprehjes, pavarësinë dhe pluralizmin e mediave sipas rekomandimeve të Komisionit të Venecias”, shkruhet në draft e siguruar. Në këtë takim, pritet t’i kërkohet BE-së asistencë për të shmangur ndërhyrjen e huaja dhe fushata dezinformuese në Shqipëri nga sulmet kibernetike.
