Rusia po konsolidon praninë e saj ushtarake në qytetin port të pushtuar të Mariupolit duke ndërtuar një bazë të madhe ushtarake.
Lajmi është bërë i ditur nga BBC ndërsa ka publikuar foto satelitore të bazës.
Kompleksi i ri në formën e shkronjës “U” ndodhet afër qendrës së qytetit. Në çatinë e saj, shihet ylli i kuq, i bardhë dhe blu i ushtrisë ruse, ndërsa aty pranë shkruhet ku “Nga ushtria ruse për qytetarët e Mariupolit”.
Imazhet vijnë mes raportimeve se Rusia po ndërton ngadalë pozicionet e saj mbrojtëse në Mariupol, pasi kundërofensivat ukrainase në jug dhe lindje gjithnjë e më shumë e vënë qytetin nën kërcënim.
Muajin e kaluar, zyrtarët e mbrojtjes në Mbretërinë e Bashkuar thanë se ushtria ruse po përdorte dy fabrika në Mariupolin e pushtuar për të prodhuar një numër të madh të “dhëmbëve të dragoit” – blloqe betoni të dizenjuara për të ngadalësuar avancimin e armikut me automjete të blinduara.
Qyteti është i një rëndësie të madhe strategjike për Rusinë, duke qenë pjesë e “urës tokësore” që e lidh me Krimenë e aneksuar.
Kujtojmë se forcat ruse rrethuan qytetin për gati tre muaj që nga nisja e luftës, ndërsa sulmet e pandërprera me raketa dhe artileri të rënëe e lanë qytetatin thuajse të shkatërruar plotësisht.
Zyrtarët ukrainas vlerësuan muajin e kaluar se rreth 25,000 civilë u vranë në sulmet, ndërsa OKB-ja tha se kishte konfirmuar vdekjen e 1,348 civilëve, por shtoi se numri i vërtetë i vdekjeve ishte “me mijëra më i madh”.
