Kryetari i Partisë Demokratike Sali Berisha, po mban një takim me banorë të degës 2 në kryeqytet.
Mes të tjerash, Berisha foli edhe në lidhje me protestën që do të mbahet nesër në Tiranë, në të njëjtën ditë që do të organizohet edhe samiti BE-Ballkani Perëndimor.
“Lini çdo gjë dhe nisuni drejt Tiranës, bujrum mirë se të vini.
Ta marrë vesh gjithë bota se ne nuk nënshtrohemi, jemi njerëz të lirë dhe se ky regjim monist nuk ka kod tjetër përveç atij të mafias e dhunës, këto orë që na ndajnë që presim me padurim protestën në bulevardin “Dëshmorët e Kombit”, ne nuk kërcënojmë, në asnjë rast e rrethanë sigurinë e miqve.
Përkundrazi, kërcënim janë klanet mafioze të Edi Ramës dhe vetë ai. Nuk na pengon dot ne, për protestë në rrugë dhe sheshe.
Të bëjmë ç’të mundemi, sa më shumë banderola, parulla në anglisht kësaj here se i kemi miqtë aty, janë fantastike. Flasin sa një fjalim, të vijnë të rinjtë t’i marrin me flamuj kombëtarë, europianë e të PD-së të mbushin sheshin”, ka thënë ai.
