Kreu i Partisë Demokratike Sali Berisha ka kërkuar revolucion nga të rinjtë për të rrëzuar nga pushteti Edi Ramën. I pranishëm me syze të errëta për shkak të hematomave nga goditja me grusht në protestë, Berisha tha se Shqipërinë nuk e shpëtojnë as deklaratat as lutjet.
Kryetari i Partisë Demokratike Sali Berisha është parë si rrallë herë me syze, por i kushtëzuar nga goditja që mori në protestën e 6 dhjetorit nga një 31-vjeçar i cili është arrestuar. Berisha është përballur me demokratët me syze të errëta për të kamufluar gjendjen e tij, dhe kjo pothuajse mund të jetë hera e parë në publik ku shfaqet në këtë formë. Por protesta dhe “grushti” i marrë e bëri Berishën të japë mesazhe të forta tek demokratët dhe kryesisht tek Forumi Rinor i Kuvendin Kombëtar: atë të revolicionit. Sipas Berishës, “Shqipëria nuk shpëtohet me lutje, Shqipëria nuk shpëtohet me deklarata. Shqipëria shpëtohet me revolucion”. Berisha ka qenë më i prerë duke pretenduar revolucion dhe kthimin e pushtetit nga Rama tek ai vetë. Duke qenë i guximshëm edhe vetë pas shpalljes “non grata” nga Amerika, Berisha kërkon guxim edhe tek te të rinjtë. “E shpëtojnë guximtarët, ata që e duan, ata që i dalin zot, e shpëtojnë ata si ju, që jeni të gatshëm të përballeni ballë për ballë, dhëmb për dhëmb me fundërrinat e regjimit të vjetër, me Edi Ramën, këtë bir xhelati që urren qenien shqiptare, që urren liritë e shqiptarëve, që urren dinjitetin e shqiptarëve”, u shpreh Berisha. Kreu i Partisë Demokratike deklaroi se është i bindur se rinia e vendit ka “të gjithë potencialin, të gjithë energjinë, entuziazmin, guximin, forcën për të shpëtuar këtë vend, për ta vendosur atë përsëri në rrugën e të ardhmes, në rrugën e dinjitetit kombëtar, në rrugën e integrimit euroatlantik”. Ai e ka qujatur rininë demokrate si atë rithemelimit të PD, revulicionit dhe të rivitalizimit. “Sot ne mblidhemi në këtë Kuvend, pasi ju, drejtuesit tuaj, anëtarët, anëtarët e PD-së, u shndërruat në fibrën më të fuqishme të rithemelimit të PD-së, të rivitalizimit të saj, u shndërruat në vis vitalis të atij revolucioni, që kishte dy qëllime madhore: shpëtimin e PD-së dhe shpëtimin e Shqipërisë. Ju vini krenarë, pasi keni realizuar me sukses të plotë misionin e parë. Ju vini krenarë dhe më të vendosur se kurrë, më të fuqishëm, më të motivuar në misionin e dytë, i cili është një mision i një rëndësie të jashtëzakonshme për të ardhmen e kombit shqiptar dhe Shqipërisë”, tha Berisha. Kreu i demokratëve ka folur edhe për qeverisjen e Edi Ramës të cilën e ka quajtur atë pushtim të brendshëm. “A do mundeni ju, me energjinë, me guximin, me përkushtimin tuaj, të shpëtoni Shqipërinë, e cila ndodhet në një rrokullisje të madhe, e cila përballet sot me pasoja të një pushtimi të brendshëm ndër më të egrit në historinë e ekzistencës tonë kombëtare. A do mund të shpëtoni ju sot Shqipërinë, e cila është sot, vendi, shoqëria më e adresuar, më viktimë e mafias shqiptare rajonale dhe botërore? Shtroj këtë pyetje, por bindja ime e thellë është se ju keni të gjithë potencialin, keni të gjithë energjinë, entuziazmin, guximin, forcën për të shpëtuar këtë vend, për ta vendosur atë përsëri në rrugën e të ardhmes, në rrugën e dinjitetit kombëtar, në rrugën e integrimit euroatlantik”, theksoi kreu i PD-së.
