Rusia është e gatshme të zhvillojë projekte të mëtejshme bërthamore në Bjellorusi, të trajnojë personelin dhe të investojë në zhvillimin e shkencës, tha presidenti rus Vladimir Putin gjatë bisedës me homologun e tij bjellorus, Alexander Lukashenko në Minsk.
“Ne po ndërtojmë një termocentral bërthamor. Blloku i parë po funksionon dhe zëvendëson rreth 4.5 miliardë metër kub gaz natyror. Ne jemi të gatshëm ta zhvillojmë më tej këtë projekt, të punojmë dhe të ndërtojmë reaktorë, por, për mendimin tim, gjëja më e rëndësishme është që ne jemi gati të krijojmë një industri, për të trajnuar stafin kombëtar, për të zhvilluar shkencën në mënyrën e duhur”, tha ai.
Presidenti rus shtoi se të dy vendet kanë marrëveshje paraprake përkatëse për këto çështje.
“Ne jemi gjithashtu të gatshëm të diskutojmë dhe të veprojmë, për të ecur më tej në këtë drejtim”, tha Putin.
Putin përmendi edhe bashkëpunimin e Rusisë me Bjellorusinë në fushën ushtarako-teknike.
“Ka një drejtim që lidhet me bashkëpunimin ushtarako-teknik. Nuk ka të bëjë vetëm me dërgesat e ndërsjella, ka të bëjë me punën e përbashkët, zhvillimin dhe bashkëpunimin në këtë fushë, duke përfshirë zhvillimin e industrive të teknologjisë së lartë”, tha Putin.
