Lionel Messi po thyen të gjitha llojet e rekordeve. Pasi pushtoi Kupën e Botës 2022, mposhti Francën e Kylian Mbappe në një finale legjendare, kampioni argjentinas po vazhdon të mahnitë, duke rishkruar faqet dhe librat e historisë. Megjithatë, bëmat e mëdha të Messit nuk kufizohen vetëm në fushë, ku talenti i tij kristalor është gjithmonë një festë për sytë, por ato gjithashtu tërheqin vëmendjen jashtë fushës dhe veçanërisht në botën e rrjeteve sociale.
Aty ku numri 10 i “Selección” po mbledh triumfe dhe rekorde të reja. Vetëm dje, postimi i publikuar në Instagram, menjëherë pas triumfit në Botëror, kishte arritur të kapërcejë, në numër pëlqimesh, atë që Cristiano Ronaldo kishte postuar në faqen e tij (në të njëjtën kohë me Messin), para fillimit të turneut në Katar (fotoja e famshme e bërë nga Annie Leibovitz, të dy duke luajtur shah mbi një valixhe udhëtimi).
Mbi 56 milionë “like” në pak më shumë se 30 orë. Kjo është trajektorja e këtij postimi të 35-vjeçarit, të fotos së tij duke ngritur trofeun e Kupës së Botës në Katar.
Brenda disa orësh, mesazhi i shpërndarë nga Messi bëri xhiron e botës, duke vazhduar të mbledhë mbështetje dhe “like” pa fund.
Nga 42 milionë (shifër në të cilën qëndroi mesazhi i CR7), postimi i kapitenit argjentinas mori 8 milionë pëlqime të tjera, duke kaluar mbi 50 milionë të tilla dhe bërë më i shpejti ndonjëherë për ta arritur këtë shifër.
Së fundi, postimi i Messit e kaloi edhe imazhin e vezës, me mbi 56 milionë pëlqime. Sot, publikimi në rrjetin social të njohur, me më shumë zemra në mënyrë absolute, e ka kaluar pragun rekord të 56 milionë “like”. Messi në çatinë e botës, kampion absolut i futbollit, sportit dhe rrjeteve sociale. Mbreti i Instagramit është ai.
