Presidenti Joan Laporta ka insistuar se largimi i Lionel Messit ishte më i miri për Barcelonën pasi klubi ishte në prag të “shkatërrimit financiar”.
Gjiganti i La Ligës u përpoq me dëshpërim ta mbante Messin në ekip pasi kontrata e tij skadoi, por vështirësitë financiare në Camp Nou e bënë të pamundur vazhdimin.
Fituesi i Kupës së Botës i dha një lamtumire emocionale klubit të fëmijërisë së tij përpara se të largohej për t’u bashkuar me Paris Saint-Germain në Francë.
Laporta këmbëngul se ai ka vepruar në interesat më të mira të klubit në atë kohë, përndryshe Barcelona do të ishte në “shkatërrim financiar”.
“Më duhej ta vendos Barçën përpara lojtarit më të mirë në historinë e futbollit. Në ato momente shkaku i rrënimit financiar nuk mund ta mbaja atë. Mendoj se ishte më e mira për klubin. Tani për tani ai është një lojtar i PSG-së dhe preferoj të mos flas për të”.
“Ne jemi të fokusuar te Barça. Leo do të jetë gjithmonë pjesë e mburojës sonë dhe unë do të doja që ai të kishte një fund ndryshe nga ai”.
“Ka disa opsione, por do të ishte e gabuar nëse do t’i thosha ato. Ne kemi një marrëdhënie pozitive”, u tha gazetarëve presidenti i Barcelonës.
Ndryshe, Laporta ka shprehur më parë dëshirën e tij për të rikthyer Messin në Camp Nou – edhe pse ai pranoi se nuk ka gjasa pasi kufizimet financiare vazhdojnë të mundojnë klubin.
