Ministrja e Infrastrukturës dhe Energjisë Belinda Balluku njoftoi se këtë vit nis gazifikimi i vendit dhe rajoni i parë që do të përfitojë është Korça. Gjithashtu për shkak të shtimit të prodhimit të energjisë elektrike në vend, nuk parashikohet rritje e çmimit për abonentët familjarë dhe bizneset e vogla.
Projekti i madh i gazjellësit “TAP” që preku edhe Shqipërinë si vend kalimi mund të kthehet në një burim me interes për gazifiikimin e vendit. Kjo është deklaruar dje nga Ministrja e Infrastrukturës dhe Energjisë, Belinda Balluku. Në një deklaratë për mediat, teksa ka bërë analizën e vitit që sapo lamë pas dhe ka prezantuar disa nga arritjet e institucionit që ajo drejton, u ndal pikërisht në çështjen e gazifikimit dhe dy projekteve konkrete që pritet të realizohen brenda këtij viti. Nisur edhe nga kriza e madhe energjitike dhe fakti që Shqipëria si burim kryesor të ngrohjes por edhe gatimit ka energjinë elektrike, gazifikimi i vendit do të ishte një arritje jo pak e vogël, si për koston në buxhetet familjare ashtu edhe për ekonominë. Duke folur për investimet e kryera, ministrja Balluku tha se, ky vit ku sapo kemi hyrë do të hapë mundësi të reja investimi, në përpjekje për të ulur humbjet teknike, sikurse ishte përcaktuar më parë nga qeveria. “Ky vit do të na japë mundësi për investime të reja, pasi do të arrijmë të ulim humbjet teknike ashtu sikurse i kishin përcaktuar. Kemi nisur një proces për kreditimin e një projekti të madh “Smart Meters” për kabinat elektrike”, është shprehur minstrja e Infrastrukturës dhe Energjisë, Belinda Balluku. Ndërkohë, duke folur për investimet në vijim, Balluku përmendi edhe projektin e gazifikimit të Shqipërisë, ku i pari do të jetë ai i qytetit të Korçës, për shkak të klimës së favorshme, ndërsa më pas radhën do ta ketë Fieri e qytete të tjera. “Ne kemi projektin e gazifikimit të Shqipërisë. 2023-i do të jetë viti i realizimit të disa projekteve. I pari do të jetë gazifikimi i Korçës. I kërkojmë falje Fierit, por do të jetë pas Korçës, e cila për hir të së vërtetës ka klimë më të përshtatshme. Nëse do të ketë sukses do të vazhdojmë edhe me qytetet e tjera. Fieri është qyteti i dytë. Ky do të jetë një nga projektet me interesante për eficiencën energjetike”, është shprehur ministrja Balluku.
Bordi i naftës
Ministrja Belinda Balluku është shprehur këtë të hënë se qeveria po shikon mundësinë që Bordi i Transparencës të shkrihet, duke qenë se ka një stabilizim të çmimit të karburanteve. Megjithatë, ajo thotë se vendimi i takon Ministrisë së Financave. “Duke qenë që çmimi është stabilizuar, kemi një diskutim për ndalimin e të funksionuarit. I përket Ministrisë së Financave dhe do jetë i mirëpritur si vendim. Shteti do të monitoroj edhe nëse bordi nuk do të jetë ekzistues”, është shprehur Balluku. Në një konferencë për projektet e vitit 2023, ministrja e Energjisë është shprehur se Bordi nuk ka synim të lehtësojë kostot, por të bëj transparencë. “Bordi nuk ka synim të lehtësoj kostot, por transparencën. Bordi nuk vendos dhe as nuk e ul dhe as nuk e ngre çmimin. Por bën transparente metodologjinë. Se ka një bursë dhe përmes kësaj metodologjie vendoset çmimi tavan. Bursën nuk e lëviz as topi. Bordi mblidhet kur ka ndryshim çmimi. Nuk e vendosim dot ne se kur mblidhet bordi”, është shprehur Belinda Balluku.
Nga Korridori Blu tek bypass-i Elbasanit
Ministrja e Infrastrukturës dhe Energjisë, Belinda Balluku prezantoi dje projektet kryesore në vend që do të nisin së shpejti sa i takon infrastrukturës rrugore. Ato përfshijnë tre lotet e Korridorit Blu, Milot-Thumanë, Kashar-Lekaj dhe Lekaj-Fier, ndërtimin e rrugës Elbasan-Qafë-Thanë, pjesë e Korridorit VIII për lotin e parë të të cilit tashmë ka nisur puna, por edhe një sërë aksesh të tjera në të gjithë vendin. Ministrja Balluku solli në vëmendje gjithashtu edhe projektin për ndërtimin e bypass-it të Elbasanit. “Do kemi projektin e plotë për Bypassin e Elbasanit për të aplikuar më pas në fondet e BE”, theksoi Balluku. Një tjetër projekt, për të cilin pritet të hapet gara brenda vitit 2023, është edhe aksi Berat-Ballaban, një aks që lidh qarkun e Beratit me atë të Gjirokastrës dhe që pritet ti jap një zhvillim agroturizimit në zonën që përshkruan. Po kështu, gjatë vitit 2023 do të ndërhyhet edhe për eliminimin e pikave të zeza në akset rrugore të vendit. Një ndërhyrje që do të realizohet në bashkëpunim me Policinë e Shtetit dhe që synon të rrisë sigurinë rrugore në vend.
Subvencionimi për familjet
Zëvendëskryeministrja dhe Ministrja e Infrastrukturës dhe Energjisë, Belinda Balluku foli edhe për arritjet si dhe për objektivat për 2023. Gjatë fjalës së saj Balluku tha se me punën e mirë të bërë me kaskadën e Drinit dhe duke optimizuar rezervën energjitike dhe depozitimin e energjisë, ja kanë dalë që të mbronim qytetarët. Ndër të tjera ministrja u shpreh se kanë ndihmuar 2 mijë familje me panelet diellore, ndërsa planifikohet që ky numër familjesh të shkoi në 20 mijë në 2023. “Kemi pasur tre vite thatësirë në krahasim me 10 vitet e fundit. Por ja kemi dalë të qëndrojmë me parashikimet. Edhe pse ka pasur çmime rekord, si 31 gushti që arriti në 1044 euro për megavator. Por me punën e mirë që u bë me kaskadën e Drinit dhe duke optimizuar rezervën energjitike dhe depozitimin e energjisë, ja kemi dalë që të mbronim qytetarët. 1 milion e 90 mijë abonentë familjarë dhe 172 mijë biznese të vogla. U mor edhe një vendim për biznesin në tensionin e mesëm 7 mijë e 200 prej tyre. Në tetor arritëm 20% të ulje të konsumit. Një nismë modeste. Kemi subvencionuar familjet që kanë vendosur panele diellore. 2 mijë familjet e parë. Gjatë 2023 planifikojmë që ky numër familjesh të shkoi në 20 mijë. Apo 8 milion euro subvencionim nga qeveria. Do të gjejmë artifica të tjera për të mbështetur familjet” shtoi Balluku.
