Një ditë pas arrestimit dhe pezullimit nga detyra të mësuesit të Edukimit Fizik, Kleanthi Laçi, kolegët e tij dhe drejtoresha e shkollës deklarojnë se Laçi nuk ka patur asnjë shfaqje të mëparshme që mund ti bënte të dyshonin në sjelljen e tij.
“Unë kam 6 vite në këtë shkollë dhe nuk e mendoj se profesori të ketë bërë diçka të tillë. Unë si mësuese për atë profesor nuk e mendoj se e ka bërë diçka të tillë. Edhe mund të jetë e inskenuar. Unë nuk e kam parë gocën që pretendon se është ngacmuar seksualisht.
Unë kam dëgjuar vetëm për një nxënëse të ngacmuar. Por me pak fjalë nuk e besoj që profesor Keli ta ketë bërë një gjë të tillë”- u shpreh mësuesja.
Drejtoresha e shkollës nuk pranoi të prononcohej për mediat, duke thënë se për Laçin ishin marrë masat, referuar pezullimit. Kleanthi Laçi, mësues i edukimit fizik në Tepelenë, u pezullua nga detyra pasi është prangosur fillimisht për akuzat “Ngacmimi seksual” dhe “Kallëzimi i rremë”.
Mësuesi i cili në Tepelenë njihet si një person i respektuar dhe profesionist në punë, u dhunua dy ditë më parë nga tre persona, të cilët tha se nuk i njihte. Mirëpo, dje, një ditë pas ngjarjes në polici u vetëdorëzua shtetasi Alvi Gumeni. Ky i fundit deklaroi se ishte kthyer nga emigrimi dhe kishte dhunuar mësuesin sepse i kishte ngacmuar seksualisht motrën e mitur.
