Akuzave të opozitës për lidhjen me ish zyrtarin e FBI-së që u arrestua në Nju Jork, Edi Rama iu përgjigj se SHBA nuk do ta kursente si fajtor nëse do të rezultonte në hetime. Duke iu referuar takimeve që pati Rama në 2017 me McGonial, opozita nuk ngurroi të hidhte akuza që kreu i qeverisë i cilësoi sikur ka nisur “gjyqi ndaj tij në Big Brotherin e politikës”.
“Akuzohet në Amerikë një zyrtar i FBI për gjëra që s’kanë as edhe një lidhje me mua (se po të kishin do t’i kishte nxjerrë hetimi i atyre që nuk manipulojnë prova e as kursejnë fajtorë) dhe në Shqipëri fillon gjyqi ndaj meje në Big Brotherin e politikës, kanaleve e portaleve!
Jam mësuar, po së fundmi kam vendosur të mos merrem më me nxjerrjen e çdo guri që hidhet përditë në lumë nga protagonistët e sojsojshëm të këtij Big Brotheri pambarim! Më pak fjalë dhe akoma më shumë punë e kontakte me njerëzit që kanë punë për të bërë apo punë për të zgjidhur.
Duhen kuptuar edhe ata që s’dinë të bëjnë asgjë tjetër, ashtu siç duhen kuptuar edhe ata që s’duan të besojnë asgjë tjetër përveç asaj që duan medoemos të besojnë”, shkroi Rama në Twitter.
