Përmes sekretarit të përgjithshëm Damian Gjiknuri, PS njoftoi sot se do të dorëzojë padinë në SPAK për të hetuar vrasjet e 21 janarit në Bulevard.
Në një konferencë për mediat nga selia e PS, Gjiknuri tha se provat e reja kanë dalë në shesh dhe organet e drejtësisë nuk mund të flenë më mbi këtë dosje.
“PS do të depozitoj sot një kallëzim në SPAK për shtetasit, Sali Berisha, Lulzim Basha dhe Ndrea Prendi për kryerjen e veprave penale të vrasjes në rrethana të tjera cilësuese referuar ngjarjes së 21 janarit 2011. Dialogjet e tregojnë qartë se vrasjet u urdhëruan nga lart dhe u përgatitën me gjakftohtësi kriminale.
SPAK të zbulojë kush e fshiu serverin. Qeveria nuk është trup gjykuese, as kryeministri nuk është prokuror. Në kushtet kur drejtësia ka zgjedhur të tallet me drejtësinë. Provat janë të mjaftueshme, organet e drejtësisë nuk mund të flenë më mbi këtë dojse. I bëjmë thirrje prokurorisë të marrë në konsideratë provat e reja.
Materiali është bërë publik, bazuar në faktet e reja që jep ky material, ne kuptojmë zinxhirin e vendimmarrjes. Del një fakt i ri, urdhri nga lart. Kush e dha urdhrin ka vetëm dy eprorë. Ish miinstri I Brendshëm dhe ish kryeministri. Është koha që e vërteta të dalë tashmë. “ u shpreh Gjiknuri.
Pyetjes së një prej gazetarëve të pranishëm se pse nuk kërkoni që të hetohen edhe organizatorët e protetës, Gjiknuri u përgjigj se ata janë hetuar dhe nuk është gjetur asgjë e paligjshme.
“Hetimi është bërë. Protesta ishte qytetare e thirrur nga PS dhe nuk gjeti asgjë të paligjshme prokuroria në atë. Drejtësia është e hapur të bëjë çfarë të dojë edhe sot. Ajo që duhet të dhembë është vrasja e qytetarëve të pafajshme. Kjo meriton hetim, ky është legjitimiteti i një shteti demokratik, ” tha Damian Gjiknuri.
