Nga Monada Mehmetaj, Strasbourg
Transporti publik, shkollat dhe furnizimet e rafinerive në Francë u ndërprenë sërish këtë të martë, pasi sindikatat udhëhoqën një valë të tretë të grevave mbarëkombëtare kundër planeve të presidentit Emmanuel Macron për t’i bërë francezët të punojnë më gjatë përpara daljes në pension.
Kjo protestë, vjen një ditë pasi parlamenti filloi debatin mbi projektligjin i cili synon që mosha e pensionit të rritet nga 62 në 64.
Sipas policisë kishte një pjesëmarrje prej 7000 vetë në shesh, ndërsa organizatorët flasin për 16000 protestues.
Në Paris mendohet që numri i protestuesve të ketë arritur në 400.000 mijë.
Gjithashtu 4500 vetë kanë protestuar sot në Molhouse dhe në Colmar.
Kujtojmë këtu, që dita e parë e grevës në mes të janarit nxorri më shumë se një milion njerëz në rrugë.
Udhëheqësit e sindikatave Philippe Martinez i CGT-së së majtë dhe Laurent Berger i CFDT-së së moderuar qëndruan krah për krah për të denoncuar reformën e pensioneve.
“Kjo reformë do të përmbysë jetën e disa brezave. Nëse qeveria ecën me kokëfortësi përpara, ne do të shtojmë protestën tonë me veprime më të gjata dhe më të vështira,” tha Martinez.
Ndërkohë që Berger nga ana tjetër, tha se këto koncesione janë vetëm arna.
“ Rritja e pensionit ligjor në 64 është thelbi i kësaj reforme dhe është thellësisht e padrejtë. Është një marrëzi demokratike që qeveria të shurdhojë ndaj protestës,” tha ai.
Presidenti francez Emmanuel Macron këmbëngul se reforma është e nevojshme për të reformuar një sistem në gatishmëri, por disa nga ekspertët e vetë qeverisë kanë thënë se sistemi i pensioneve është në gjendje relativisht të mirë dhe ka të ngjarë të kthehet përfundimisht në një buxhet të balancuar edhe pa reforma.
Sindikatat paralajmërojnë që më 11 shkurt, ditën e shtunë të ketë një tjetër protestë, dhe vendi i nisjes do të jetë në sheshin Kleber Strasbourg.
