Bashkia Sarandë ka reaguar pas shpërthimit me eksploziv të një hoteli dy-katësh, duke bërë me dije se një grup specialistësh të Ndërmarrjes së Shërbimeve, Emergjencave Civile dhe Shërbimit Zjarrfikës, kanë evidentuar dëmet e shkaktuara në hapësirat publike përreth.
Bashkia u bën thirrje strukturave ligjzbatuese për zbardhjen e plotë të ngjarjes dhe vënien përpara përgjegjësisë ligjore, të autorëve.
“Pas situatës jo të zakonshme, të krijuar mëngjesin e sotëm në një nga bizneset hoteliere në shëtitoren e qytetit të Sarandës, një grup specialistësh të Ndërmarrjes së Shërbimeve, Emergjencave Civile dhe Shërbimit Zjarrfikës, kanë evidentuar dëmet e shkaktuara në hapësirat publike përreth.
Punonjës të Ndërmarrjes së Shërbimeve Publike në Bashki, po punojnë në shëtitoren e qytetit dhe hapësirat publike përreth, për të bërë të mundur eliminimin e pasojave dhe dëmeve në këto hapësira, si dhe normalizimin e situatës. Në të njëjtën kohë, u gjendemi pranë qytetarëve të dëmtuar për çdo nevojë, që mund të kenë, për kapërcimin e kësaj situate.
Inkurajojmë strukturat ligjzbatuese për zbardhjen e shpejtë të ngjarjes dhe vënien para përgjegjësisë ligjore të autorëve. Jemi të bindur se kjo ngjarje dhe pasojat e saj, të cilat, për fatin e mirë janë vetëm materiale, do të eliminohen shpejt dhe nuk do të kenë asnjë impakt negativ për qytetin” njofton Bashkia.
Mëngjesin e kësaj të hëne, një hotel dy-katësh në qytetin bregdetar u hodh në erë me eksploziv dhe nga vala e shpërthimit, u shkaktuan dëme në banesat dhe bizneset përreth. Nga shpërthimi, nuk pati persona të lënduar.
