Në të gjithë Francën po zhvillohen demonstrata kundër planeve të presidentit francez Emmanuel Macron për të rritur moshën e daljes në pension me dy vjet, nga 62 në 64.
Demonstrata e Parisit nisi pak minuta më parë nga lindja e qytetit, drejt Place de la Nation. Disa protestues tashmë janë përleshur me policinë në Nante, në Francën perëndimore. Një barrikadë është ngritur në një vendkalim tramvaji dhe demonstruesit kanë bllokuar gjithashtu rrugët hyrëse në qytet.
Ka pasur gjithashtu bllokime të trafikur që shtrihen disa kilometra në qytetin veriperëndimor të Rennes, ku demonstruesit bllokuan unazën dhe një makinë u dogj.
Policia ka përdorur gaz lotsjellës kundër një grupi personash të maskuar. Përleshje janë raportuar në qytetin perëndimor të Rouen, sipas agjencisë së lajmeve Reuters.
Demonstratat e tjera në qytete si Nice dhe Bordeaux raportohen të jenë kryesisht paqësore deri më tani.
