Gjykata e Durrësit ka lënë në burg 7 nga 8 të arrestuarit gjatë 2 operacione policore antidrogë, të koduara “Foremost” dhe “Last deal”.
Gazetarja raporton për BalkanWeb se për 24-vjeçaren me iniciale K.B gjykata ka vendosur masën e sigurisë “detyrim paraqitje”.
Bëhet me dije se janë lënë në burg shtetasit: Goni Muça (alias Gentjan Lici, Gentjan Muça, Gentjan Ferra), Tani Muça, 17- vjeçari me iniciale A. V., Amonali Halili, Ergi Curri, Gentian Konesha dhe Stivens Bulku.
8 të rinjtë u arrestuan 2 ditë më parë, pas një hetim 6 mujor për veprimtarinë e shpërndarjes së dorgave të forta, në zonën e Sukthit dhe në qytetin e Durrësit.
Goni Muça ishte në rolin e furnitorit me kokainë, për shtetasit e tjerë, të cilët, pasi e blinin atë, në bashkëpunim me njëri-tjetrin, e shpërndanin në zonën e Sukthit dhe të Durrësit, si dhe në lokalet e natës, në qytetin e Durrësit. Për ndarjen e lëndës narkotike, ata kishin përshtatur ambiente të posaçme në lokalet e tyre, konkretisht në lokalin e shtetasit Gon Muça, në zonën e Sukthit, dhe në lokalin e Ergi Currit në Durrës.
Si rezultat i këtyre operacioneve, policia sekuestroi në cilësinë e provës materiale: 1 pako me kokainë, me peshë 130 gramë; 40 doza me lëndë narkotike të llojit kokainë; 3 automjete, 2 prej tyre luksoze; 96 mijë lekë të rinj dhe disa shuma në euro, franga dhe paund; 3 peshore elektronike që shërbenin për peshimin dhe ndarjen e lëndës narkotike në doza të vogla, 1 dorezë hekuri dhe 14 aparate celulare.
