Kryetari i Partisë së Lirisë, Ilir Meta, priti sot në një takim në selinë e partisë, të Dërguarin e Posaçëm të SHBA për Ballkanin Perëndimor, z. Gabriel Escobar dhe ambasadoren e SHBA, znj. Yuri Kim, me të cilët diskutoi për afro 40 minuta.
Në përfundim të takimit, Meta nuk dha hollësi, por njoftoi se PL do të bënte një deklaratë zyrtare për çfarë u bisedua me diplomatët e lartë amerikanë dhe i ftoi gazetarët të ishin të pranishëm në hapjen e fushatës zyrtare të koalicionit “Bashkë Fitojmë”, në stadium, më 15 prill në Tiranë.
“Ju falenderoj për vemëndjen. Do të kemi komunikatë zyrtare nga Partia e Lirisë. Ju ftoj të gjithëve në stadium, të gjithë atje, – bëri thirrje Meta. – Përsa i përket takimit do të bëjmë deklaratë zyrtare”, shtoi ai.
