Silvio Berlusconi ka lënë terapinë intensive dhe tashmë është shtruar në një repart të zakonshëm spitalor.
Ky lajm është bërë me dije nga vetë vëllai i Berluscionit, Paoli, i cili në një deklaratë për mediat tha se gjendja shëndetësore e ish-kryeministrit italian është e mirë.
“Gjithçka është në rregull”, tha ai para gazetarëve.
Ndërkohë miq dhe kolegë të shumtë e kanë vizituar Berlusconin. Gjithashtu edhe presidenti i Mediaset, Fedele Confalonieri mbërriti në spital pak para orës 16:30 ku dhe shkoi të interesohet nga afër për shëndetin e ish-kryeministrit.
Berlusconi u shtrua në spital 12 ditë më parë për shkak se gjendja e tij shëndetësore u përkeqësua, pasi ai prej kohësh vuan nga leucemia. Nata e fundit e liderit të Forza Italia në terapi intensive ishte e qetë dhe ishin mjekët ata që dhanë dritën jeshile për transferimin në një dhomë të zakonshme spitali.
