Kryetari i PD-së zyrtare, Enkelejd Alibeaj, i bëri thirrje Komisionit Qendror të Zgjedhjeve dhe Autoritetit të Mediave Audiovizive, të ndalojë përdorimin e emrit, logo-s dhe simboleve të partisë të PD-së nga Sali Berisha dhe mediat. Ish-kryeministrin e akuzon si “grabitës” të simboleve të PD-së, ndërsa për median ngre dyshimin se po konfuzojnë votuesin duke e cilësuar Sali Berishën kryetar të partisë.
Edhe pse logo dhe sigla e Partisë Demokratike ju dha Enkelejd Alibeajt, ish lideri historik Sali Berisha po i përdor ato pas asnjë lloj kufizimi, madje nuk ka lëshuar as zyrat e Partisë Demokratike. Kryetari i komenduar i PD-së Alibeaj i ka dërguar një kërkesë Komisionit Qendror Zgjedhor dhe AMA për përdorimin e siglës dhe logos si dhe i kohës televizive. Drejtoresha e Komunikimit të fushatës së kandidatit të Partisë Demokratike zyrtare për Bashkinë e Tiranës, Mirela Karabina, ka dalë këtë të hënë në një deklaratë për mediat, ku bën me dije se i ka bërë thirrje institucioneve përgjegjëse të zgjedhjeve për të ndaluar menjëherë përdorimin e emrit të Partisë Demokratike, logos dhe simboleve të saj nga subjekte zgjedhore të cilat nuk kanë asnjë lidhje me këtë forcë politike. “Shtabi elektoral i kandidatit të Partisë Demokratike për Bashkinë Tiranë, zotit Roland Bejko, i bënë thirrje institucioneve shqiptare, Komisionit Qendror të Zgjedhjeve, AMA-s dhe mediave, të marrin masa dhe të ndalojnë menjëherë përdorimin e emrit të Partisë Demokratike, logos dhe simboleve të saj nga subjekte zgjedhore të cilat nuk kanë asnjë lidhje me Partinë Demokratike”, thuhet në deklaratën e shtypit të Karabinës. Ajo ju ka këkruar institucioneve zbatimin e ligjit. “Ne kërkojmë nga këto institucione, zbatimin e shtetit ligjor dhe vendimeve të gjykatave të Republikës së Shqipërisë. I bëjmë thirrje çdo subjekti politik, të mos përdorin dhe keqpërdorin emrin e Partisë Demokratike, në media apo takime elektorale, nga njerëz dhe drejtues të formacioneve të ndryshme elektorale. Partia Demokratike e Shqipërisë, përfaqësohet në garën për Bashkinë Tiranë me të vetmin kandidat, zotin Roland Bejko, i njohur dhe i regjistruar në këto zgjedhje sipas të gjitha ligjeve në fuqi dhe në zbatim të kodit zgjedhor shqiptar. Ne do të marrim të gjitha masat ligjore për të mbrojtur identitetin e Partisë Demokratike, identitetin e të djathtës shqiptare që ajo përfaqëson”, thotë ndër të tjera në këtë deklaratë Karabina. Zëdhënësja për mediat e kandidatit Bejko bën gjithashtu me dije se PD-ja ka paraqitur sot “Ankesë në lidhje me keqinfomimin e disa subjekteve mediatike”, drejtuar znj. Armela Krasniqi, Kryetare e Autoriteti te Mediave Audiovizive, znj. Desada Metaj, Zëvendëskryetare e Mediave Audiovizive, dhe z. Ilirjan Celibashi, Komisioner Shtetëror i Zgjedhjeve. “I bëjmë thirrje mediave dhe institucioneve që monitorojnë ato, të zbatojnë parimin e hapësirave televizive sipas parimit “par condicion” për subjektin politik Partia Demokratike si partia më e madhe opozitare dhe të gjithë kandidatëve të saj për këshillat bashkiak dhe kryetar bashkie. Faleminderit!”, përfundon deklaratën e saj Karabina. Karabina e vë theksin tek partia më e madhe opozitare, ndërsa si e tillë kësaj partie po i largohen kandiatët dhe doli e gjymtuar në këto zgjedhje lokale që do të mbahen më 14 maj.
Kërkesa e Alibeajt
Kryetari i Partisë Demokratike, Enkelejd Alibeaj, i bëri thirrje Komisionit Qendror të Zgjedhjeve dhe Autoritetit të Mediave Audiovizive, të ndalojë përdorimin e emrin, logo-s dhe simboleve të partisë të PD-së nga subjekte të tjera zgjedhore, dhe të nisin një hetim administrativ ndaj mediave që sipas tij po konfuzojnë votuesin duke e cilësuar Sali Berishën kryetar të partisë. Alibeaj ka bërë ankesë zyrtare pranë KQZ-së dhe AMA-s, duke theksuar se ka vetëm një PD legjitime të regjistruar në zgjedhjet e 14 majit. “Disa media audiovizive me frekuencë kombëtare i referohen deputetit Sali Berisha si “Kryetar i Partisë Demokratike” dhe “Partia Demokratike Grupi i Rithemelimit”. Kjo sjellje përvecse përbën keqinformim, krijon konfuzion të qytetarëve, përsa i përket lidershipit zyrtar të kësaj force politike, pjesëmarrjes në zgjedhje dhe kandidaturave të mbështetura nga ana e saj”, thuhet në ankesën e Alibeajt. Lidhur më këtë, kryetari i Komanduar i Partisë Demokratike ka kërkuar që të kryhet një hetim administrativ dhe marrjen e masave të nevojshme për garantimin e informimit objektiv dhe të vërtetë të qytetarëve. “Në rastin konkret, është e qartë se paraqitja e z. Berisha si kryetar i Partisë Demokratike, apo i fakteve të tjera referuar këtij subjekti zgjedhor lidhur me kandidatët e mbështetur, përkatësinë e kandidatëve në këtë forcë politike apo koalicionet në të cilat ajo është pjesmarrëse është një informacion i pavërtetë dhe që paraqet haptazi njëanshmëri politike në debatin e brendshëm të kësaj force politike. Në këto kushte, në cilësinë e Kryetarit të Komanduar të Partisë Demokratike kërkoj nga ana juaj fillimin e menjëhershëm të një hetimi administrativ dhe marrjen e masave të nevojshme për garantimin e informimit objektiv dhe të vërtetë të qytetarëve”, thuhet ndër të tjera në ankesën e PD-së.
