Kreu i Partisë së Lirisë, Ilir Meta ka treguar se gjatë takimit me Sali Berishën në selinë blu koordinuan axhendën për javët në vijim.
Meta u shpreh se opozita po ecën pa ndalim drejt fitores së 14 majit dhe Rama është i tmerruar, sipas tij, nga ky fakt.
“Koordinuam për axhendën për javët që vijnë. Jam shumë i lumtur të prek vetë atmosferën e jashtëzakonshme të fitores në bashkinë e Gramshit. Kanë çuar një kandidat që ka ikur dy vjet nga Gramshi dhe rikthehet tani. Gramshit ia kanë zhveshur dhe pyjet me bandat e tyre. E njëjta gjë ka ndodhur kudo.
Kandidatët tanë nuk përfaqësojnë thjesht koalicionin “Bashkë Fitojmë”. Përfaqësojnë shumë më tepër. Koalicioni jonë është shumë më i gjerë se opozita politike. Vetëm ndëshkimi me votë do i japë dhe kandidatëve të rilindjes mundësinë të marrin partinë e tyre nga mjaftistët.
Nuk kam kohë të merrem as me Ramën, që është tmerruar nga fakti që opozita ecën pa ndalim drejt 14 maj, është tmerruar nga autobusi i shpresës e fitores, nga të gjitha planet e kandidatëve tanë”, tha kreu i PL-së.
Meta tha se ata janë të shqetësuar për shkak të manifestimeve të jashtëzakonshme në takimet me kandidatët e opozitës.
Meta komentoi edhe pankartat e vendosura në kryeqytet me fotot e Ramës duke theksuar se ai nuk vë dot kukullat e tij përballë superkandidatëve të opozitës.
“Ka shumë të drejtë edhe Rama dhe Ramarucët e tij kudo ku ndodhen që janë të tmerruar nga manifestimi në stadiumin kombëtar ashtu si janë tmerruar nga manifestimet në Durrës, Elbasan apo dje nga shpërthimi i jashtëzakonshëm i qytetarëve të Gramshit. Do të përpiqen të shmangin thelbin e kësaj gare elektorale të 14 Majit që bëhet për të shpëtuar bashkitë tona nga vjedhja e përbindshme që ka bërë Edi Rama në këto katër vite.
Për transparencë dhe do i merrni nga nivelet përkatëse. Sa i takon 14 Majit është shumë e qartë, çdo ditë që kalon ankthi i atij që do të mbillte pemë pasi mbolli vetëm shkatërrim dhe beton, duke vënë dorë edhe mbi trashëgiminë kulturore, mbi gjelbërimin, mbi oborret e shkollave. Duke grabitur hapësirat publike. Tani është e qartë se erdhi ora e llogaridhënies.
I dëshpëruar sepse e kupton që çdo skenar i tij që opozita të mos regjistronte 61 superkandidatët e saj, dhe nuk ka konkurrentë përballë kandidatëve tanë sepse zgjodhi të emëronte kukulla katër vite më parë dhe tani kërkon të mbjellë konfuzion me ato billboardet e shtrenjta ky që do kursente para për fushatën.
A mund të dalë ajo zonja në Durrës, përballë Igli Carës? A mund të dalë kukulla në Elbasan, mister plastelina përballë një personalitet si Luçiano Boçi, a mund të dalë ai që firmos për inceneratorët që nuk ekzistojnë përballë kryebashkiakut të ardhshëm Belind Këlliçi? Ata nuk dalin dot dhe ky përpiqet të mbjellë konfuzion dhe të ikë nga llogaridhënia”, u shpreh ai.
