Policia e Shtetit ka reaguar pas ndalimit të djalit të kandidatit socialist për kryebashkiak në Has, mbrëmjen e djeshme duke ngarkuar me furgon disa pako ushqimore.
Policia bën me dije se furgoni i tij u ndalua nga disa qytetarë në mbrëmje, të cilët më pas njoftuan komisariatin e Hasit. Blutë pasi mbërriën në vendngjarje kërkuan autorizimin e Prokurorisë për kontroll brenda makinës.
Pas kontrollit, policia thotë se në makinën e drejtuar nga djali i kandiatit socialist Halit Mulaj janë gjetur 21 pako me mbishkrimin “Rezerva Materiale Shtetërore”. Sakaq materialet i kanë kaluar prokurorisë për të zbuluar nëse bëhet fjalë për një rast të tentativës për blerje votash.
Kujtojmë se kandidati i PS, Halit Mulaj reagoi ditën e sotme duke thënë se ushqimet ishin të destinuara për iftar për natën e Kadrit.
Reagimi i Policisë:
Më datë 17.04.2023, rreth orës 21:00, një grup personash kanë bllokuar në qendër të qytetit të Hasit, një automjet furgon me targa AB 333 EC, me drejtues shtetasin B. M., me pretendimin se ishte i ngarkuar me pako me ndihma të cilat dyshonin se do të shpërndaheshin për llogari të një kandidati të një subjekti politik, dhe për këtë rast kanë njoftuar Komisariatin e Policisë Has dhe është vënë në dijeni Prokuroria pranë Gjykatës së Rrethit Gjyqësor Kukës.
Specialistët për Hetimin e Krimeve të Komisariatit të Policisë Has, pasi kanë marrë kallëzim nga shtetasi M. D. (njëri nga shtetasit që kishin bllokuar furgonin në qendër të qytetit), mbi pretendimin e tij, kanë njoftuar menjëherë Prokurorinë pranë Gjykatës së Rrethit Gjyqësor Kukës, me qëllim marrjen e autorizimit për ushtrimin e kontrollit në këtë furgon.
Pas marrjes së autorizimit nga Prokuroria, shërbimet e Komisariatit të Policisë Has kanë shoqëruar menjëherë në ambientet e Komisariatit të Policisë, furgonin me targë AB 333 EC dhe në prezencë të oficerëve të Policisë Gjyqësore, drejtuesit të furgonit dhe palës kallëzuese, është ushtruar kontroll në brendësi të furgonit, ku janë konstatuar 21 pako me mbishkrimin “Rezerva Materiale Shtetërore”, të cilat ishin ngarkuar në magazinën e bashkisë.
Në vijim të veprimeve procedurale për këtë rast, janë pyetur në cilësinë e personave që kanë dijeni mbi pakot e gjetura në furgon, shtetasit B. M., E. M (vëllezër) dhe Sh. M. (me detyrë magazinier i bashkisë).
Specialistët për Hetimin e Krimeve të Komisariatit të Policisë Has, në drejtimin e Prokurorisë pranë Gjykatës së Rrethit Gjyqësor Kukës, vijojnë veprimet procedurale për sqarimin dhe dokumentimin e plotë të këtij rasti.
