Arben Hajdarmataj, ish-drejtues policie ka folur këtë të Enjte në studion e Klan News sa i takon vrasjes së djeshme të biznesmenit Ardian Nikulaj.
Hajdarmataj e cilësoi ngjarjen të bujshme duke theksuar se i ndjeri ka pasur një ndikim të madh tek zona e Shëngjinit, kjo prej raportit të tij me politikën.
Duke përmendur dhe faktin që kreu i Policisë së Shtetit shkoi sot në Lezhë, ai shpresoi që kjo ngjarje të mos ketë lidhje me politikën duke qenë se jemi dhe në prag të zgjedhjeve lokale.
“Është një njeri siç e thatë ju që pozicioni i tij politik e bën që përeç anës së biznesit, e bën me ndikime shumë të mëdha sidomos në zonën e Shëngjinit. Ngjarja është e bujshme, dhe vetë fakti që ka shkuar drejtori i Policisë së Shtetit atje duhet të ketë një pistë kryesore të kësaj vrasje sepse larg qoftë nëse ka ndodhur për shkak të politikës, imagjino se ku jemi. Nuk e përjashtoj sepse me ato që di unë, i ndjeri ka pasur ndikim shumë të madh përsa i përket raporteve politike. Ka ndikim te elektorati jo si lider lokal, por ka pasur ndikim në atë rajon për të tjetërsuar apo për t’ju dhënë drejtim këtyre zgjedhjeve”, u shpreh Hajdarmataj.
